WM 2014 in Brasilien, 9. Juni bis 29 Juni

Mit drei Kumpels war i en der obige Zeit en Brasilien. D’Idee hodd onsr Tom ghet. Der isch während der Zeit fuffzig worda, ond hodd gmoind S‘Geld wär fir Brasilien besser vrbrauchd, wia fir a grauss Geburdsdagsfeschd. Drzu komma senn na no dr Michael, dr Fritz (wo eigendlich Norbert hoissd) ond zua guadr ledschd au i.

Ois war glei klar. Nemlich, dass wir dui Rois selbr organisierad, also koi Pauschalrois buchad. Mit onsrer Planung hemmr no scho em November 2012 agfanga. Also zom a Zeitpunkt wo mr no ned amool qualifizierd warad. Sozusaga Risiko von Aafang a.

Planung / Vorbereitung

Unterkunft

Mir hen endschieda, dass mr am a Schbielort a „Basislager“ machad, ond dann zu de oinzlne Schpiel fliegad. Onsr Wahl isch no ledschdendlich uff a Feriahaus en Caponga gfalla. Caponga isch a Fischerdorf , so ca. 60 km von Fortaleza weg. S’Haus hodd no au sinnigerweise „Villa Caponga“ ghoissa. War echt subbr. Fir jeden a oiges Schloofzemmr mit oigener Dusche ond WC.

S oinzige Hendrnis zwischam Haus ond am Meer war quasi dr Pool.

Eintrittskarten

Die hemmr bei jedr Verkaufsphase von dr FIFA beadraagd. Dr Vrkauf hodd jo scho vor dr Grubbaauslosung agfanga. Do hemmr hald amool ällas mit Schbielord Fortaleza kauft, was ganga isch. Rauskomma isch no schlussendlich Deutschland – Ghana und Griechenland – Elfenbeinküste. Karda firs Schbiel Deutschland – Portugal hodd no dr Michael an Land zoga. Bloos fir USA – Deutschland hemmr koine Karda ibr d’FIFA griagd. Dia hemmr no ibr ebay erschdeigrd. Was dia koschd hen, sage jetzd abr ned.

Gruppenauslosung

Am 6.12.2013 wars dann soweid. D Grubba sen ausglosd worda. Zom d’Auslosung gugga hen mir ons beim Micha droffa. Ois war klar. Mir hen, ausgehend von onsram Basislager, obedengd die Grubbe G brauchd. Oi Los oms andr isch zoga worda, mir sen ghoggd wia uff Schdeggnodla, ond Dschermäny war emmr no nedd drbei. No warad bloos no Belgien ond mir em Dopf. Wer jedzd en d Grubbe G komma isch, brauch i jedzd nemme exdra erwehna. Germany!!! Onsr Jublgschroi hodd ma glaub en ganz Cannschdadd gheerd. Weil jedzd hemmr a Hoimschbiel en Fortaleza ghed, ond dia andre zwoi Schpiel warad en Salvador ond Recife. Wo am nächschde zo onsram Basislager glähga isch.

Flüge

Dr Thomas hodd no flugs ibr sai Reisebüro da Interkonintentallflug ond dia Inlandsflieg nach Salvador ond Recife buachd. Hodd ons pro Nase so om dia 2.200 Euro koschd. Semmr abr no guad wegkomma, wenn ma bedengd, wia dia Brei nochher no nuffgschossa send.

Trikots

Wenn ma scho zur a WM fliagd, brauchd ma nadierlich au des bassende Outfit. Mir henn ons doher jedr a Nationaltrikot kaufd, ond henda beflogga lassa. Sieht doch guad aus, odr?

No als Erklärong. Henda schdohd jo druff „Fritzles kleine Kneipe“. Des isch jedzd koi Boiz, sondern so hoissd onsr Tippgemeinschafd, die mir dann jo au en Brasilia vrtredda hen.

Abflug

Am 9. Juni ischs no frihmorgens losganga. Z’Echterdenga hemmr ons no nomohl ablichda lassa, bevors en Fliegr neiganga isch. Gfloga semmr no om halbsiebane zerschdamohl noch Frankfurt. Von do aus ischs om kurz noch Neine weiderganga noch Lissabon. Z’Lissabon war no a längere Pause. Weiterganga hätt’s om 15 Uhr solla.
 

Wia nudzd ma so a Pause uff am Flughafa Lissabon? Klar, mit ma Bierle odr au zwoi. War ällas ganz luschdig, bis dr Mich gmoind hodd „Do schdohd hendr onsram Flug so a komischs Word mit C“. Jetzd henner richtig vermudad: des Word war Cancelled. Was ghoissa hodd: Älle Passaschier von dem Flug nei en en Bus – ond ab ens Marriott Lisboa. Sozusaga gschdrandet en Lissabonn. War abr ganz luschdig dort. Bis uffs uffstanda am andra morga om halbviere.
 

Dann hodd abr ällas glabbd ond mir sen so gega Elfe en Fortaleza glandad. Am Flughafa semmr vom Luciano (ibr den ond sai Valdirene vrzehle schbädr noo me) abghold worda ond gega Middag war mr no en Caponga.

Praia Caponga

Onsr Haus hanne Eich joo scho ondr Unterkunft zoigd. Was Caponga aagohd, lass e jedzd oifach amool a kloine Auswahl von Bilder aus onsram riesiga Fundus schbrecha:

Schee, gell!!! Also ons hodds saumäßig guad gfalla. Abr nedd bloos dr Schdrand ond s Meer warad subbr, noi, em Bsondra au dia Leid dord. Ibraus freindlich ond zuvorkommend. Guad, mir warad dia oinzige –zumendeschd europäische- Turischda en dem Caponga, ond doher so ebbas wia Exoda. Abr so Grandadaggl, wia ses bei ons manchmol geid, han i dord nedd droffa. Rechde Fauschd geballd ond Dauma hoch, drzu verbal no a „tudo bem“ (wie geht’s, alles klar), no hosch scho gwonna ghedd. War uff jeden Fall emmr luschdig, wenn mir do durch da Flegga gloffa sen. Ond was dia Brasilianer au no symbadisch machd. Se drengat au saugern a Bierle.

Ond no sag‘ bloos no Oinr, d’Brasilianer wärad oorganisierd bzw. s’däd nix glabba. Pfeifadeggl! Beischbiel: Mir hen mit Schregga feschdgschdelld, dass en onsrer Villa koi Fernseher gwea isch. Des war nadierlich äußerschd mend, weil mir jo dia andre Schbiel au hen seah wella. Was jedzd doa? Hemmr beschlossa, dass mr hald en billiga Fernseher kaufad. Dr Michael hodd no dui Frog, wo mr den kaufa ka, ens Google-Ibrsetzungsbrogramm eigebba on em Luciano zoigd. „Momento“ hoddr gmoind.

Meine andre drei senn no a bissle am Schdrand schbaziera gloffa. I ben jo bekanndrmasa a bissle a faule Sau, ond han mrs liebr uff dr Liege bequem gmachd. War e no grad so am einigga, als uff oimal leba en d’Bude komma isch. Drei Brasilianer (was au sonschd) sen reigschdirmd. Oiner mit ra Antenn, dr andr mit ma scheena Flachbildschirmfernseher ond dr Dritt‘ mit ra Kablroll. Ratz fatz d’Antenn mondierd, Fernseher nagschdelld ond s’Kabl frei vrlegd – ond scho hemmr en Fernseher ghedd. Ond des nedd kaufd sondern fir drei Wocha glieha. Hodd jeden von ons ca. 20 Euro koschd. Do kannsch no au wiedr nedd joomra.

Schdrandbars

Wenn mr no grad nedd am essa warad (Valdirene, Du bisch oine von de beschde Kechinna dr Weld)...

... em Meer romtobt bzw. em Pool badad henn - oder ons von denne ganze Schdrapaza erhola henn miassa...

... no hemmr dia Schdrandbars osichr gmachd. Do lasse jedzd oifach amool wiedr d’Bildr schbrecha:

                                                                    Fanfreindschafd VfB Stuttgart ond Ceará SC (v.re: Fritz, Tom, Miguel, Micha, Sonny)

Ond au dees isch Caponga:

Gruppenspiele

Fir welche Schbiel mir Eidriddskardda ghedd hen, hanne jo scho ondr „Eintrittskarten“ uffzähld. Deswega gang i no glei zo de oinzelne Schbiel. Wobei i dia Schbiel nedd nomool kommendier, i denk’ dia hennr jo älle selbr gsäa. Mir gohds do me oms dromrom.  Ois no: Mir senn vom Flughafa emmr mit effendliche Verkehrsmiddl (Metro on Bus) ens Schdadio gfahra, ond henn ons nedd oimal vrfahra. Hodd jedzd nedd obedengd do dra glega, dass mir ons so guad auskennd henn,sondern dass ällas beschdens organisierd war. Ibraal sen Volunteers romgschdanda ons henn de Leid gsaid, wo’s langgohd. Also a goßes Lob an die Organisadora.

Salvador

Noch faschd ra Woch Urlaub, ischs no am 16. Juni ernschd worda. Am 16. Juni hemmr en Salvador gega Portugal gschbield. Do hodds ghoissa bald uffstanda, weil onsr Fliegr scho om siebane ganga isch. Dr Luciano hodd ons zom Flughafa gfahra ond no ischs losganga:

Deutschland - Portugal 4:0 (3:0)

Deutschland: Neuer - Boateng, Mertesacker, Hummels (73. Mustafi), Höwedes - Khedira, Lahm, Kroos - Müller (82. Podolski), Özil (63. Schürrle), Götze

Portugal: Rui Patricio - Joao Pereira, Bruno Alves, Pepe, Coentrao (65. A. Almeida) - Joao Moutinho, Miguel Veloso (46. R. Costa), Raul Meireles - Nani, Hugo Almeida (28. Eder), Cristiano Ronaldo

Schiedsrichter: Mazic (Serbien)
Zuschauer: 51.081

Tore: 1:0 Müller (13./FE), 2:0 Hummels (32.), 3:0 Müller (45.), 4:0 Müller (78.)

Gelbe Karte: - / Pereira
Rote Karte: Pepe nach Unsportlichkeit (37.)

Do hemmr echd a subbr Schpiel gseah. Eine Riesaschdimmong en dem Schdadio - ond des au scho bevor mr dia Dor gschossa henn. Geeshaud pur!!!! Ond ois muass mr jedzd au saga. Dia Portugiesa henns echd mit Fassung traga.

Von Salvador selbr hemmr so guad wia nix gseah. Flughafa akomma - nei en Bus - Schdadio raus - noch am Schbiel nei en Bus - Flughafa raus - ond ferdig. War abr nedd so schlemm, schliesslich semmr wegam Fussball dogwea, ond uff dr Fanmeile em Schdadio wars au rechd luschdig.

Ois isch mr uff der Busfahrd ens Schdadio no uffgafalla. Dia Schdrossahendlr. Glaubsch, dia dabbad uff ra vierschburiga Schdrooss zwischa de Audo ommanadr ond brobierad Ihre Wara an da Maa zom griaga. Zom oina en maine Auga saugfährlich ond zom andra frog’ I mi, wia lang des daurad, bis dia a Bleivergifdung henn.

Fortaleza I

Am 21. Juni war no onsr Hoimschbiel. Deutschland gega Ghana en Fortaleza. Do hemmr noo nedd so bald aufschdanda miassa, sondern henns gemiedlich oganga kenna. Dr Luciano hodd ons no zom “Via Sul” gfahra. Des isch so ebbas wia onsr Breuningerland, ond do war au a Haldeschdell fir da Shuttle-Bus zur Arena Castelao. Do mir bei dr Valdirene joo emmr so xonde Sacha zom essa griagd henn, hemmr ons en dem Via Sul amool glei en Hamburger mit schlonziche Pommes on Ketchup naighaua. Dees war au amool wiedr so richdig sauguad.

Mit onsre vollgfressane Ränza senn mr no zom Bus gschlabbd ond zom Schdadio gfahra. Von doo, wo dr Bus ghalda hodd, hemmr noo no so zwoi Kilamedr laufa miassa. I sag drs, des war so a Kuglfuhr. A Affahitz, dass dr bloos Briah so nagloffa isch. Ond a Gschroi om oin rom. Uff jedam Quadradmedr senn dia Brasilianer romgschdanda ond henn laudschdarg Wasser, Bier ond was woiß I no ällas zom Vrkauf ahbodda.

Mir henns noo abr gligglicherweise bis zom Schdadio gschaffd. An dr Sicherheidskondroll dr nächschde Schock. Hodd mir doch der Dagdiab von Kondrolleur mai Feirzeig abgnomma. Z’gfährlich wärs, hodd r gmoind. Maine ganze Hoffnunga hanne jedzd uff da Michael gsedzd. Nix wars. Au er hodd sai Feirzeig en Sagg schmeissa miassa. Troschdlose Aussichda: Ca. faif Stond ohne Raucha!! mool seah, ob des guadgoohd. Abr jedzd erschd wiedr a baar Bildr:

Des mit am raucha hemmr no au noo nagriagd. Dr Michael on I henn emmr guggd, wo’s rauchd. Dr Micha hodd noo en Japaner mit ra brennenda Zigaredd gseah, ond hodd sich nadierlich glei Feir gebba lassa. Grauchd hemmr noo sozusaga em rollierenda Syschdem. En dem Zsammahang no en Tipp fir alle Rauchr von fildrlose: Deggad Eich drhoim guad ei mit Tabak odr Eira Marke. Sonschd miassad r wia mir Dunhill odr a ähnlichs Glomb raucha. En dem Brasilia griagsch oms Verregga koine Fildrlose ond au koin Tabak zom selbr dreha. Nooch a baar Bierla ond a baar Zigareddla senn mr noo nai zu onsre Blädz.

Glei nooch am Apfiff, hodds a bissle a Ärgerniss gebba. Henn doch Ordnr gladd onsre Zaunfahna abghengd, weil dia Fahna anscheinend FIFA-Slogans verdeggd han sollad. Dees hodd nadierlich Pfiffe ond Schbrechchöre gega da Weldvrband zur Folge ghedd. Kaum senn d Ordnr weg, henn onsre d Fahna fluggs wiedr aufghängd. Do siehd ma abr doch amool wiedr was fir Soifasiedr bei der FIFA hoggad.

Deutschland - Ghana 2:2 (0:0)

Deutschland: Neuer - Boateng (46. Mustafi), Hummels, Höwedes - Khedira (70. Schweinsteiger), Lahm, Kroos - Özil, Müller, Götze (69. Klose)

Ghana: Dauda - Afful, Boye, Mensah, Asamoah - Rabiu (78. Badu), Muntari - Atsu (72. Wakaso), Boateng (52. Jordan Ayew), Andre Ayew - Gyan

Schiedsrichter: Ricci (Brasilien)
Zuschauer: 59.621

Tore: 1:0 Götze (51.), 1:1 Andre Ayew (54.), 1:2 Gyan (63.), 2:2 Klose (71.)

Gelbe Karten: - / Muntar

Bei dem Schbiel hemmr nedd bloos wega dr Hitz gschwidzd. Danl onsrm Miro senn mr abr nomool mit ma blaua Aug’ drvokomma.

Fortaleza II

Noo hemmr joo au no Karda firs Schbiel Griechenland gega d’Elfenbeinküste ghedd. Des Schbiel war au en Fortaleza. Ond doo warad die Fanlager erschdmals gschbalda:

Bevor mir abr ens Schdadio senn, warad mr en Fortaleza am Iracema-Schdrand. Doo war au die offizielle Fanmeile von dr FIFA.

Dr Kick selbr war groddaschlechd. Dia meischde von Eich wissad wahrscheinlich gar nemme, wias ausganga isch. Wega dem hier die Torfolge:
Griechenland - Elfenbeinküste 2:1, Tore: 1:0 Samaris (42.), 1:1 Bony (74.), 2:1 Samaras (90+3./Foulelfmeter)
Somidd senn dia Ivorer en dr ledschda Sekund ausgschieda - ond mi hodds a Bier koschd. Dr Micha hodd sich nadierlich gfreid, weil der hodds gsoffa. Ibrigens isch am Micha a guadr Schbordfotograf verloraganga. Des nächschde Bild vom entscheidenda Elfmetr hodd dr Michael selbr gschossa.

Ibrigens!! Den Fehlr mit am Feirzeig hemmr nadierlich nemme gmachd. Einwandfrei naigschmuggld ond noo ganz gmiadlich raucha kenna.

Recife

Gleichr Ablauf wia vor am Schbiel en Salvador, bloos hald, dass mr noch Recife gfloga senn. Noch dr Landung hemmr noo glei gmergd was Sache isch. Gsoichd hodds, was hodd raa kenna. Wenn mrs positiv siehd, allerdengs bloos oimool an dem Dag. Ens Schdadio semmr noo mit dr Metro. Hodd ällas guad klabbd, bis dass mr hald teilweis bis zu de Knechl em Wassr gschdanda senn.

Von dr ledschda Metro-Schdazio ischs noo voll mit am Bus ens Schdadio ganga. Bushaldeschdell nadierlich ausserhalb von dr Schberrzone. Noo hodds wiedr ghoissa laufa. Noch ma Weile hanne noo dr Fritz gfroogd: “Siehsch Du doo eigendlich en Hauch vom a Schdadio?” Antwort: “Noi”. Weil sonschd ischs joo so, dass ma irgendwann amool zumindeschdens d’Fludlichdmaschda siehd, bei ons gar nix zom seha gwesa. Noo gohds a bissle da Buggl nuff, om a Kirfle nomn, ond was hemmr doo? Richdig, des Schdadio. Henn dia Grasdaggl des Teil doch tadsächlich enn a Loch neibaud. Abr au sonsch war dui Arena nix - hodd oifach koi Ausschdrahlung ghedd.

Uff jeden Fall henn dia Schdrossahendlr wahrscheinlich des Gschäfd ihres Läbens gmachd. Ibraal senn se gschdanda ond henn gschria “Cappa, Cappa”. Domid hennse die Ganzkörperkondome aus Blaschdigg gmoind. I han koin gnomma. Liebr bäddschnass als so a Blaschdiggglomb om da Ranza rom. Ond oifach zom ibrziaga wars au nedd, wia r uff de nächschde zwoi Bildr seha kennad: 

Irgendwia schmeggds Bierle au em Rega. Ond bei dem Bierle hodd dr Fritz feschdgschdelld, dass mr heid gar nedd verliera kennad. Worom? Ganz oifach - s war Fritz-Walter-Wetter.

Ond noo hemmr au en Recife wiedr en Haufa nedde Leid droffa.

Dr Kick war joo jedzd grad nix bsonders. Abr Hauptsach gwonna.

USA - Deutschland 0:1 (0:0)

Deutschland: Neuer - Boateng, Mertesacker, Hummels, Höwedes , Lahm, Schweinsteiger (76. Götze), Kroos, Özil (89. Schürrle), Podolski (46. Klose), Müller

USA: Howard - F. Johnson, Gonzalez, Besler, Beasley, Beckermann, J. Jones, Zusi (84. Yedlin), Bradley, Davis (59. Bedoya), Dempsey

Schiedsrichter: Ravshan Irmatov (Usbekistan)
Zuschauer: 41.876

Tore: 0:1 Müller (55.)

Gelbe Karten: Gonzalez, Beckermann, Höwedes

S’Schlemmschde an dem Daag war fir mie dui Riggfahrt mit dr Metro. Doch noo a feichds Hemmadle aaghedd, d’Metro rammelvoll, ond noo henn dia gmoind se miassad Frischluft mit gfihlde minus 5 Grad durch dui Klimaanlage naibloosa. Hodd mie gwondrd, dass dees koine Greizschmerza nooch sich zooga hodd. Guad hoimkomma semmr nadierlich au. Ond noo isch ons bewussd gworda, dass mr bloos no zwoi Daag en onsrm Caponga henn (schluchz, heul). Bevor i abr uff die ledschde Daag eigang, noo was anders:

Brasilienspiele

D’Brasilienschbiel hemmr nadierlich nedd drhoim sondern en oinra von onsre Schdrandbars guggd. Des war emmr rechd luschdig. Zu dem Thema bloos a baar von denne Bildr, wo mr do gmachd henn.

Letzte Tage

Dr Reschd isch glei vrzehld. Dia ledschde zwoi Daag hemmr meh odr wenigr mit faulenza vrbrochd. Verganga senn se nadierlich wia em Flug. Am Daag von onsrm Rückflug hemmr dann noo en leichda Schregga griagd. Dr Thomas hodd onsr Abflugzeit dscheggd ond fechdgschdelld, dass mr zwoi Stond verschbädad fliagad. Ond scho isch onsr Zeitpuffr en Lissabon fleeda ganga. Doo war mr doch amool echd gschbannd, wia des mit der Hoimrois weidrgohd.

Zunächschd hodd ons dr Luciano am schbäda Nochmiddag zom Flughafa gfahra. Doo hemmr joo jedzd noo genügend Zeit ghedd, ond so hemmr onsre ledschde Real en a baar Deesla Bier inveschdierd. Wia mir noo gemiedlich bei onsrm Bierle hoggad, senn dia Mexikaner eigloffa. Dia henn jo an dem Daag en Fortaleza gega Holland gschbield. Dia warad dr vielleichd agfressa!! Koi Wondr, wenn da nooch ra 1:0-Fihrung noo en de ledschde Minudda mit 2:1 verliersch. Dia henn sich echd zuagschiddad, doo senn mir wahre Woisaknaba drgega. Guad, midd a baar hemmr ons no noo ganz nedd ondrhalda.

Ond noo semmr losgfloga mit der Hoffnung, dass mr ibr am Atlantik en guada Riggawend hennn, damit r dui Vrschbädung wiedr a bissle raihola kaa. Nix wars mit raihola. Abr wenigschdens hodd dr Fliagr nooch Mincha uff ons gwardad. Wahrscheinlich wär dr TAP nomool en Flugausfall z’deir worra. Weil vor a baar Daag hodd jedr von ons 600 Euro zrigg griagd, wega dem Flugausfall uff am Hinflug. Also - schdadd ma gepflegda Bierle en Lissabon hald a bissle Laufschridd quer durch da Flughafa. Von Mincha nooch Schduagard isch noo ällas gladd gloffa, ond scho warad mir wiedr dahoim.

Fazit

So jeesasmääsich viel hemmr jedzd joo nedd gsäa von dem Brasilien. Onsr urspingliche Planung, amool so drei Daag uff Rio nomm zom fliaga, isch an der Preisexplosio während der WM gscheidrd. Dia drei Daag heddad ons annähernd so viel koschd, wie dr ganze Brasiliatrip zsamma. Ond dees wars no wirklich nedd wert. Abr mir perseenlich hodd doo jedzd ährlich gsagd nix gfehld. I hanns en onsrm Caponga soo schee gfonda, dass i -aussr zo de Schpiel nadierlich- gar nedd hann ford wella.

Des hodd nadierlich au mit an onsrm Haushälterehepaar glega. So äbbas wia d’Valdirene ond da Luciano fendsch fai nedd alle Daag. Kochd (morgends, middags, obends), Disch deggd, Disch abgraimd, gschbiald, budzd, gwäscha, eikaufd (nia en biertechnischa Engpass ghedd), Pool budzd, jeden Obend en Capipirinha gmachd (vom feinschda) ond, ond ond. S war ons manchmool faschd scho peinlich. Glebd hald, wia dr Vogel em Hanfsama.

Dia andre positive Sacha hennr joo scho en maim Berichd gfonda ghedd. Auf dia brauche joo jedzd nemme aiganga.

Ond aufgrond von dem ällam wars fir mi a ganz tolle Sach‘ ond a overgesslichs Erlebnis!!!!

Ond dronga hemmr nadierlich au a bissle was: