Prolog

Uff d’Welt komma benne am 26. Auguscht 1950 en Schopfla (Schopfloch) uff dr Schwäbischa Alb. Ond als a klassische Hausgeburd ben i en echdr gebirdigr
Schopflanger. Nix z’Kircha (Kirchheim) odr z’Schtuagard em Grangahaus. Noi! Z’Schopfla en dr Bergstrooß 4, em Haus von meim Ehne ond meinr Ahna,
also de Großeldra midderlicherseids.

Komma ben i scheinds mit Donner ond Getöse. An dem Dag war a so a Oweddr, dass s sogar d’Fuhrwerk uff de Feldr omkeit hot. Mei Bäsle, d’Helga isch
scheinds ganz uffgregt em Haus romgsaut ond hot laudhals emmr wiedr gschria „A Bubale isch do, a Bubale isch do. Do sehn r amol was des fir a Freid war,
wo i komma be. An des ka i mi nadierlich logischerweis nemme erinnra. Des isch mr hald so vrzehld worra.

Meine Großeltra hen a kloine Landwirdschafd ghet. Dui hot zom Leba nadierlich net groicht. Wega dem isch mei Ehne au no seim eigendlicha Beruf als
Schäfr nochganga. Zudem hen se no faif Kendr ghet. Ond dia moo do no drhoim gwohnt hen, sen hald zom schaffa en d Babierfabrig zom Scheiffale
(Scheufelen) noch Lenninga (Oberlenningen) ganga.

Ond d’Familie vädderlicherseids, d’Sonnbergers. Do hanne koi Familiabild mai gfonda. Bloos ois mit meine andre Großeltra. Zweggs dr Ondrscheidung
han i zu denne Oma und Opa gsaid.

Mai Vaddr ond seine Eldra sen Sudedadeidsche, die wo 1946 vrdrieba worda sen. Z’Schopfla hen se noo a nuia Hoimad gfonda.

Ond do hot mai Vaddr noo au sei Marie kennaglernd. Er en Ruggsaggdeitscher ond drzu naa au no kadolisch. Des war seinerzeit en so ma Neschd wia
Schopfla schau a Skandäle. Oine em Flegga hots abr richdig gseah. Dui hot gsaid: “I woiß gar ned, was dia andre eigendlich zom Aussedza hen.
I moin, a evangelischs Oi bassd au en a katholischa Pfann”. Älle Widrigkeida zom Trotz hen se em Oggdobr 1949 drodzdem gheiradad. Ond s’hot
noo au 48 Johr ghoba, bis mai Muadr 2007 gschdorba isch.

So des wars amool mit dem Prolog. Weiter gohds jedzd mit Schopfla, wo i en Großteil von maim Leba verbrochd han. Ab do schreib’ i abr em “Honoratiorenschwäbisch”. Isch für Euch leichter zum lesa und für mich leichter zum schreiba, gell.

Des isch jedzd mai Familie midderlicherseids, d’Wörners. Vorna mai Ehne ond mei Ahna, ond drhendr ihre faif Kendr. Von lengs her gseah kommd do mai Dedle, noo mai Muadr, dr Fritz, d’Elsa ond dr Hans.